குவைத் நோக்கி சீறி பாய்ந்த ஏவுகணைகள் வளைகுடா பிராந்தியத்தில் அமெரிக்கா மற்றும் ஈரான் இடையேயான ராணுவ மோதல்கள் உச்சகட்டத்தை எட்டியுள்ள நிலையில், பஹ்ரைன் மற்றும் குவைத் நாடுகளின் இரவு வானத்தில் ஏவுகணைகளும், வான்பாதுகாப்பு ஏவுகணைகளும் மோதி வெடிக்கும் அதிர்ச்சியூட்டும் காட்சிகள் சமூக ஊடகங்களில் வெளியாகி உலகையே உலுக்கி வருகின்றன.அமெரிக்க மத்திய கட்டளைப் பிரிவு (CENTCOM) வெளியிட்டுள்ள அவசர அறிக்கையின்படி, ஹோர்முஸ் ஜலசந்தியில் அமெரிக்கா நடத்திய வான்வழித் தாக்குதல்களுக்குப் பதிலடி கொடுக்கும் வகையில், ஈரான்  தனது இஸ்லாமியப் புரட்சிகரக் காவல் படை (IRGC) மூலமாக பஹ்ரைன் மற்றும் குவைத்தில் உள்ள அமெரிக்க ராணுவத் தளங்களைக் குறிவைத்து 7 பாலிஸ்டிக் ஏவுகணைகளை (Ballistic Missiles) ஏவி அசுரத் தாக்குதல் நடத்தியுள்ளது.இதனுடன் பல தற்கொலை ஆளில்லா போர் விமானங்களும் (Suicide Drones) ஏவப்பட்டதாகத் தெரிவிக்கப்பட்டுள்ளது.ஈரானிய ஏவுகணைகள் தங்கள் எல்லைக்குள் நுழைந்ததைத் தொடர்ந்து, பஹ்ரைன் மற்றும் குவைத் ஆகிய இரு நாடுகளிலும் விமானப் படைத் தாக்குதலுக்கான அபாயச் சங்கொலிகள் (Air Raid Sirens) நள்ளிரவில் முழங்கின.அங்கிருந்த அமெரிக்கா மற்றும் உள்ளூர் நாடுகளின் பேட்ரியாட் (Patriot) வான் பாதுகாப்பு அமைப்புகள் உடனடியாகச் செயல்பட்டு, அசுர வேகத்தில் வந்த ஈரானிய ஏவுகணைகளை நடுவானிலேயே இடைமறித்துச் சுட்டு வீழ்த்தின.ஏவப்பட்ட 7 ஏவுகணைகளில் 6 ஏவுகணைகளை அமெரிக்க மற்றும் பஹ்ரைன் கூட்டுப் படைகள் நடுவானில் துல்லியமாகத் தாக்கி அழித்தன.7-வது ஏவுகணை இலக்கை எட்டாமல் நடுவழியில் உடைந்து விழுந்ததாக சென்ட்காம் தெரிவித்துள்ளது.