38,000ஐ தாண்டிய டெங்கு நோயாளர்களின் எண்ணிக்கை இந்த ஆண்டின் இதுவரையான காலப்பகுதியில் நாட்டில் 38,095 டெங்கு நோயாளர்கள் பதிவாகியுள்ளதாக தேசிய டெங்கு கட்டுப்பாட்டுப் பிரிவு தெரிவித்துள்ளது.ஜனவரி 01ஆம் திகதி முதல் ஜூன் 05ஆம் திகதி வரையான காலப்பகுதியிலேயே இந்த எண்ணிக்கையிலான நோயாளர்கள் பதிவாகியுள்ளதாக அந்தப் பிரிவின் பணிப்பாளர் வைத்தியர் கபில கண்ணங்கர தெரிவித்துள்ளார்.தற்போது நிலவும் மழையுடனான வானிலை காரணமாக எதிர்வரும் நாட்களில் டெங்கு நோயாளர்களின் எண்ணிக்கை மேலும் அதிகரிக்கும் அபாயம் உள்ளதாக சுட்டிக்காட்டியுள்ள அந்தப் பிரிவு, தற்போதைய தரவுகளின்படி கொழும்பு, கம்பஹா, களுத்துறை, கண்டி, காலி, மாத்தறை, அம்பாந்தோட்டை, கேகாலை, இரத்தினபுரி, புத்தளம், கல்முனை மற்றும் மட்டக்களப்பு ஆகிய மாவட்டங்கள் அதிக அவதானமிக்க மாவட்டங்களாக அடையாளம் காணப்பட்டுள்ளதாகத் தெரிவித்துள்ளது.மேற்குறிப்பிட்ட மாவட்டங்களில் அதிக ஆபத்துள்ள 74 சுகாதார வைத்திய அதிகாரி (MOH) பிரிவுகளை மையமாகக் கொண்டு ஜூன் 08, 09 மற்றும் 10 ஆகிய திகதிகளில் விசேட கொசு ஒழிப்புத் திட்டம் நடத்தப்படவுள்ளது. இது சுகாதார ஊழியர்கள், இலங்கை பொலிஸார், முப்படைகள் மற்றும் பல தன்னார்வ அமைப்புகளின் பங்களிப்புடன் செயல்படுத்தப்படவுள்ளது.டெங்குவை பரப்பும் 'ஈடிஸ் ஈஜிப்தி'  மற்றும் 'ஈடிஸ் அல்போபிக்டஸ்'  ஆகிய கொசு இனங்கள் தெளிவான நீர் தேங்கியிருக்கும் எந்தவொரு சூழலிலும் பெருகும் அபாயம் உள்ளதால், வாரத்திற்கு குறைந்தது 30 நிமிடங்களாவது இது குறித்து அவதானம் செலுத்தி, கொசுக்கள் பெருகக்கூடிய இடங்களை அகற்றுமாறு தேசிய டெங்கு கட்டுப்பாட்டுப் பிரிவு பொதுமக்களிடம் கோரிக்கை விடுத்துள்ளது.மேலும், காலை மற்றும் மாலை வேளைகளில் கொசு கடியிலிருந்து தப்பித்துக் கொள்வதற்குத் தேவையான நடவடிக்கைகளை எடுக்குமாறும், அதற்காக உடலை முழுமையாக மூடும் ஆடைகளை அணியுமாறும், அங்கீகரிக்கப்பட்ட கொசு விரட்டிகளைப் பயன்படுத்துமாறும் பொதுமக்கள் அறிவுறுத்தப்பட்டுள்ளனர்.அத்துடன், ஒருவருக்கு கடுமையான காய்ச்சலுடன் தலைவலி, தசை மற்றும் மூட்டு வலி, குமட்டல் மற்றும் வாந்தி, தோலில் சிவப்பு புள்ளிகள் ஏற்படுதல் மற்றும் இரத்தப்போக்கு போன்ற அறிகுறிகள் காணப்பட்டால், உடனடியாக வைத்தியசாலைக்கு அல்லது தகுதிவாய்ந்த வைத்தியரிடம் சென்று தகுந்த சிகிச்சையைப் பெற்றுக் கொள்ளுமாறு அந்தப் பிரிவு வலியுறுத்தியுள்ளது.மேலும், காய்ச்சலைக் கட்டுப்படுத்துவதற்காக 'பரசிட்டமால்' (Paracetamol) மாத்திரையை மட்டுமே பயன்படுத்துமாறும்; ஆஸ்பிரின் (Aspirin), மெஃபனமிக் அமிலம் (Mefenamic acid), இபுபுரூஃபன் (Ibuprofen), டைக்ளோஃபெனாக் (Diclofenac) போன்ற NSAID ரக மருந்துகளையும், பிரெட்னிசோலோன் (Prednisolone), டெக்ஸாமெதாசோன் (Dexamethasone) போன்ற ஸ்டெராய்டு (Steroid) ரக மருந்துகளையும் பயன்படுத்துவதைத் தவிர்க்குமாறும் டெங்கு கட்டுப்பாட்டுப் பிரிவு பொதுமக்களிடம் கேட்டுக்கொண்டுள்ளது.