உயர்தரப் பரீட்சையை ஒத்திவைக்காவிடில் நீதிமன்ற நடவடிக்கை உதய கம்மன்பில எச்சரிக்கை இன்றைய தினம் எதுல்கோட்டேயிலுள்ள கட்சித் தலைமையகத்தில் நடைபெற்ற ஊடகவியலாளர் சந்திப்பில் பிவிதுரு ஹெல உறுமயவின் தலைவர் சட்டத்தரணி உதய கம்மன்பில ஊடகங்களுக்கு கருத்து தெரிவிக்கையில்,இலங்கையில் 500 ஆண்டுகளுக்கும் மேலாக பௌத்தர்களும் கத்தோலிக்கர்களும் மிகுந்த நல்லிணக்கத்துடன் வாழ்ந்து வருகின்றனர். இவர்களில் கலப்புத் திருமணங்கள் சாதாரணமாக நடைபெறுவதுடன், ஒரே குடும்பத்தில் இரு மதங்களையும் பின்பற்றுமளவிற்கு இந்நல்லிணக்கம் சிங்கள சமூகத்தின் மிகப்பெரிய பலமாக உச்சக்கட்டத்தை எட்டியுள்ளது. இவ்வாறான பின்னணியில், பௌத்த - கத்தோலிக்க ஒற்றுமையைத் தகர்த்து சிங்கள சமூகத்தைப் பலவீனப்படுத்தும் நுட்பமான சதியொன்று பின்னணியில் அரங்கேறி வருகின்றது. கத்தோலிக்கத் திருச்சபைக்குள் ஆதிக்கம் செலுத்தும் சிறில் காமினி, ஜூட் பெர்னாண்டோ, ருவன் சில்வா போன்ற சில மதகுருமார்களைக் கொண்ட NGO கும்பலே இதற்குத் தலைமையேற்கிறது. ஈஸ்டர் தாக்குதலின் பொறுப்பிலிருந்து முஸ்லிம் தீவிரவாதிகளை விடுவித்து, அதனை பௌத்தர்கள் மீது சுமத்துவதே இவர்களின் பிரதான நோக்கமாகும். இதற்காகவே அசாத் மௌலானா போன்றோரின் உண்மைக்குப் புறம்பான கூற்றுகளை அடிப்படையாகக் கொண்டு, பேராயர் கர்தினால் அவர்களும் செயற்பட்டு வருகின்றாரா என்ற கேள்வி எழுகிறது. மேலும், தற்போதைய மாலிமா அரசாங்கம் ஈஸ்டர் தாக்குதலின் முக்கிய சாட்சியான இப்ராஹிம் நானாவின் வீட்டுப் பணிப்பெண் மர்மமான முறையில் வெளிநாடு செல்ல அனுமதித்துள்ளதன் மூலம், அவர் விடுதலையாவதற்கும் அவரது சொத்துக்கள் மீண்டும் அவருக்கே கிடைப்பதற்கும் வழிவகை செய்துள்ளது.மறுபுறம், 2026ஆம் ஆண்டுக்கான க.பொ.த உயர்தரப் பரீட்சையை எதிர்வரும் ஆகஸ்ட் 10ஆம் திகதி நடத்துவதற்கு அரசாங்கம் திட்டமிட்டுள்ளமையானது மாணவர்களின் அடிப்படை உரிமைகளை கடுமையாக மீறும் செயலாகும். கடந்த பரீட்சைப் பெறுபேறுகள் மார்ச் 31 அன்றே வெளியானதால், இரண்டாம் மற்றும் மூன்றாம் முறை பரீட்சை எழுதும் மாணவர்களுக்கு இம்முறை தயாராவதற்கு வெறும் 133 நாட்கள் மட்டுமே கிடைத்துள்ளன. கடந்த 2024 இல் 178 நாட்களும், 2025 இல் 198 நாட்களும் வழங்கப்பட்டிருந்த பின்னணியில் இது பெரும் அநீதியாகும். அதேபோல், முதலாம் முறை பரீட்சை எழுதும் மாணவர்களுக்கும் கடந்த காலங்களில் 27 முதல் 32 மாதங்கள் வரை அவகாசம் வழங்கப்பட்டிருந்த போதிலும், இம்முறை வெறும் 21 மாதங்கள் மட்டுமே வழங்கப்பட்டுள்ளது. தித்வா' புயல், ஆசிரியர் வேலைநிறுத்தம் மற்றும் பொருளாதார நெருக்கடிகளால் புத்தகங்கள் கூட நாசமாகி கடுமையாகப் பாதிக்கப்பட்ட இந்த மாணவர்களுக்கு இழைக்கப்படும் இந்த அநீதியானது, அரசியல் அமைப்பின் 12(1) பிரிவின் கீழ் "அனைவரும் சமமாக நடத்தப்பட வேண்டும்" என்ற விதிமுறையை நேரடியாக மீறுகின்றது. எனவே, கல்வி அமைச்சு உடனடியாக இப்பரீட்சையை ஒத்திவைத்து மாணவர்களுக்கு நியாயம் வழங்க வேண்டும் என வலியுறுத்துவதுடன், தவறும்பட்சத்தில் மாணவர்களின் அடிப்படை உரிமைகளைப் பாதுகாக்க நீதிமன்றத்தில் வழக்குத் தொடரப்படும் என எச்சரிக்கின்றோம். கடந்த 2022 இலும் இதேபோன்றதொரு சூழலில், அப்போதைய அதிபர் ரணில் விக்ரமசிங்க மற்றும் கல்வி அமைச்சர் சுசில் பிரேமஜயந்த ஆகியோர் சட்டபூர்வ நியாயங்களை ஏற்றுக்கொண்டு பரீட்சையை ஒத்திவைத்தனர். தற்போதைய திசைகாட்டி அரசாங்கமும் மாணவர்களின் நலன் கருதி அவ்வாறே மனிதாபிமானத்துடன் செயற்படும் என நம்புகிறோம்.