விற்பனை சரிவால் சைபர்ட்ரக் உற்பத்தியைக் குறைக்கிறதா டெஸ்லா உலகப் புகழ்பெற்ற மின்சார வாகனத் தயாரிப்பு நிறுவனமான டெஸ்லா, தனது சைபர்ட்ரக் உற்பத்தியைக் குறைக்கத் திட்டமிட்டுள்ளதாக அதன் தலைமைச் செயல் அதிகாரி எலான் மஸ்க் தெரிவித்துள்ளார். இதன்படி, அமெரிக்காவின் டெக்சாஸ் கிகாஃபேக்டரியில் 2027ஆம் ஆண்டின் மத்தியில் சைபர்ட்ரக் உற்பத்தி படிப்படியாகக் குறைக்கப்படவுள்ளதாகக் கூறப்படுகிறது.ஒருகாலத்தில் பாரம்பரிய பிக்கப் வாகனங்களுக்குப் போட்டியாக அறிமுகப்படுத்தப்பட்ட சைபர்ட்ரக், எதிர்பார்த்த அளவுக்கு விற்பனையைப் பெறவில்லை. வாகனத் தரவுத் தளமான கெல்லி புளூ புக்கின் தகவலின்படி, அமெரிக்காவில் கடந்த ஆண்டு 20,237 சைபர்ட்ரக் வாகனங்கள் மட்டுமே விற்பனையாகியுள்ளன. இது 2024ஆம் ஆண்டின் 38,965 வாகன விற்பனையுடன் ஒப்பிடுகையில் 48 சதவீத வீழ்ச்சியாகும். ஆரம்பத்தில் ஆண்டுக்கு 250,000 வாகனங்களை விற்பனை செய்ய இலக்கு நிர்ணயித்திருந்த நிலையில், இந்தச் சரிவு டெஸ்லாவுக்குப் பெரும் பின்னடைவாகப் பார்க்கப்படுகிறது.இதற்கிடையில், சைபர்ட்ரக் உற்பத்திக்காகப் பயன்படுத்தப்படும் வளங்களைத் தன்னாட்சி வாகனத் தொழில்நுட்பம் மற்றும் சைபர்கேப் ரோபோடாக்சி உற்பத்திக்குத் திருப்பிவிட முடியும் என மஸ்க் தெரிவித்துள்ளார். டெஸ்லா தனது எதிர்காலத் திட்டங்களில் ரோபோட்டிக்ஸ் மற்றும் தானியங்கி வாகனங்களுக்கு அதிக முக்கியத்துவம் அளித்து வருகிறது.எனினும், சைபர்கேப் திட்டம் இன்னும் ஆரம்பகட்டத்திலேயே இருப்பதால், சைபர்ட்ரக் விற்பனைச் சரிவை உடனடியாக ஈடுசெய்யுமா என்பது கேள்விக்குறியாக உள்ளது. மேலும், சைபர்ட்ரக் உற்பத்தி வேறு ஆலைக்கு மாற்றப்படுமா அல்லது முற்றிலும் நிறுத்தப்படுமா என்பது குறித்தும் தெளிவான அறிவிப்பு வெளியாகவில்லை.அமெரிக்க இடைக்காலத் தேர்தலில் மஸ்க் ஆதரித்த பல குடியரசுக் கட்சி வேட்பாளர்கள் தோல்வியடைந்த பின்னணியிலும், டெஸ்லாவின் இந்த அறிவிப்பு வெளியாகியுள்ளது. இதனால், எதிர்பார்த்த விற்பனையைப் பெறாத சைபர்ட்ரக் திட்டத்திலிருந்து டெஸ்லா விலகி, தனது எதிர்காலத்தை ரோபோடாக்சி மற்றும் செயற்கை நுண்ணறிவுத் தொழில்நுட்பத்தில் கட்டியெழுப்ப முயற்சிக்கிறதா என்ற கேள்வி எழுந்துள்ளது.