ஈராக் மீதான அமெரிக்கா–சவூதி கூட்டு தாக்குதல்-ஈரான் கடும் கண்டனம் ஈராக்கில் அமெரிக்கா மற்றும் சவூதி அரேபியா மேற்கொண்ட தாக்குதல்களுக்கு ஈரான் கடும் கண்டனம் தெரிவித்துள்ளது.ஈராக்கின் அதிகாரப்பூர்வ நிறுவனங்களுக்குச் சொந்தமான இடங்கள் மற்றும் அர்பயீன் நினைவு நாளை முன்னிட்டு கர்பலாவுக்குச் செல்லும் யாத்ரீகர்களுக்கான ஓய்விடங்கள் உள்ளிட்ட பகுதிகள் தாக்கப்பட்டதாக ஈரான் தெரிவித்துள்ளது.வியாழக்கிழமை வெளியிட்ட அறிக்கையில், ஈரான் வெளியுறவு அமைச்சகம், இந்தத் தாக்குதல்கள் ஈராக்கின் தேசிய இறையாண்மை மற்றும் பிராந்திய ஒருமைப்பாட்டை அப்பட்டமாக மீறியுள்ளதுடன், ஐக்கிய நாடுகள் சாசனத்தையும் மீறுவதாக குற்றம்சாட்டியுள்ளது.மேலும், மத்திய கிழக்கு முழுவதும் மோதலை விரிவுபடுத்த வாஷிங்டனும் இஸ்ரேலும் மேற்கொண்டு வரும் முயற்சிகளின் ஒரு பகுதியாகவே இந்தத் தாக்குதல்கள் அமைந்துள்ளதாக ஈரான் விமர்சித்துள்ளது.முகமது நபியின் பேரனான இமாம் ஹுசைனின் நினைவாக அனுசரிக்கப்படும் 40 நாள் துக்க காலத்தின் நிறைவைக் குறிக்கும் அர்பயீன் நிகழ்வில் பங்கேற்க, உலகின் பல பகுதிகளில் இருந்து லட்சக்கணக்கான ஷியா முஸ்லிம்கள் ஈராக்கின் கர்பலா நகரை நோக்கிப் பயணித்து வருகின்றனர்.பலர் நீண்ட தூரத்தை கால்நடையாகக் கடந்து செல்லும் நிலையில், யாத்ரீகர்கள் தங்குவதற்காக அமைக்கப்பட்ட ஓய்விடங்களும் தாக்குதல்களில் பாதிக்கப்பட்டதாக ஈரான் தெரிவித்துள்ளது.ஈரான் வெளியுறவு அமைச்சகம் இந்தத் தாக்குதல்களை “குற்றவியல், மனிதாபிமானமற்ற மற்றும் ஆத்திரமூட்டும் நடவடிக்கைகள்” என கடுமையாக விமர்சித்துள்ளது.