அமெரிக்க ஜனாதிபதியின் சீன பயணம் ஒத்திவைப்பு ஈரானுக்கு எதிரான அமெரிக்க-இஸ்ரேலியப் போர் வொஷிங்டனின் கவனத்தை பெரும்பாலும் ஈர்த்து வருவதால், இந்த மாத இறுதியில் சீன ஜனாதிபதி ஜீ ஜின்பிங்கைச் சந்திக்கும் திட்டங்களைத் தாமதப்படுத்துவதாக அமெரிக்க ஜனாதிபதி டொனால்ட் ட்ரம்ப் தெரிவித்துள்ளார். இது குறித்து வெள்ளை மாளிகையில் செய்தியாளர்களிடம் நேற்று (17)  ட்ரம்ப்  தெரிவித்துள்ளார். அவர் மேலும் தெரிவிக்கையில், " நாங்கள் சந்திப்பை ஒத்திவைக்கிறோம், நாங்கள் சீனாவுடன் இணைந்து செயல்படுகிறோம். அவர்கள் இதற்குச் சம்மதித்தனர். போர் காரணமாக, நான் இங்கே இருக்க விரும்புகிறேன். நான் இங்கே இருந்தாக வேண்டும்."ஈரானுக்கு எதிரான போர் மூன்றாவது வாரமாக நீடித்து வரும் வேளையிலும், ஹோர்முஸ் நீரிணை கிட்டத்தட்ட அனைத்து உலகளாவிய கப்பல் போக்குவரத்திற்கும் மூடப்பட்டிருக்கும் நிலையிலும், வொஷிங்டனில் தங்கியிருக்க விரும்புவதாக ட்ரம்ப் தெரிவித்துள்ளார்.வர்த்தக வரிகள், அரிய வகை கனிமங்கள் மற்றும் காந்தங்கள் மீதான சீனாவின் ஏற்றுமதிக் கட்டுப்பாடுகள், தாய்வானுடனான அமெரிக்காவின் உறவு மற்றும் சீனாவின் ஃபென்டானில் ஏற்றுமதி வரையிலான பல்வேறு பிரச்சினைகள் குறித்து ட்ரம்ப்பும் ஜீ ஜின்பிங்கும் விவாதிப்பார்கள் என எதிர்பார்க்கப்பட்டது.தென் கொரியாவில் நடந்த சந்திப்பைத் தொடர்ந்து ஜீ ஜின்பிங்கும் ட்ரம்பும் ஒரு போர் நிறுத்த ஒப்பந்தத்தில் கையெழுத்திட்டதால், ஒக்டோபர் மாதம் அமெரிக்க-சீன வர்த்தகப் போர் தற்காலிகமாக நிறுத்தப்பட்டது. மேலும், இரு தரப்பினரும் தங்கள் சர்ச்சையைத் தீர்ப்பதற்காக ஒரு விரிவான வர்த்தக ஒப்பந்தத்தை உருவாக்கும் பணியில் ஈடுபட்டு வருகின்றமை குறிப்பிடத்தக்கது.