வடகொரியாவை சமாதானப்படுத்த டிரம்பின் புதிய வியூகம் அமெரிக்க அதிபர் டொனால்ட் டிரம்ப், தென்கொரியாவுடன் நடத்தப்படும் கூட்டு ராணுவப் பயிற்சிகளை கணிசமாகக் குறைக்குமாறு பென்டகனுக்கு உத்தரவிட்டுள்ளார். இந்தப் பயிற்சிகள் அதிக செலவு கொண்டவை என்றும், வடகொரியாவுக்கு தேவையற்ற மற்றும் விரோதமான சமிக்ஞையை அனுப்புவதாகவும் டிரம்ப் தெரிவித்துள்ளார்.டிரம்ப், வடகொரிய அதிபர் கிம் ஜாங் உன்னுடனான தனது “மிகச் சிறந்த உறவை” காரணமாகக் குறிப்பிட்டுள்ளார்.அதே நேரத்தில், ஈரானுக்கு எதிரான அமெரிக்க நடவடிக்கைகளில் தென்கொரியா போதுமான ஆதரவு வழங்கவில்லை என்ற அதிருப்தியும் அவரது முடிவில் இடம்பெற்றுள்ளது.இந்த அறிவிப்பு வந்திருப்பது மிகவும் கவனிக்கத்தக்க நேரத்தில் “Ulchi Freedom Shield” எனப்படும் அமெரிக்கா–தென்கொரியா கூட்டு ராணுவப் பயிற்சி ஆகஸ்ட் 17 முதல் 27 வரை நடைபெற திட்டமிடப்பட்டிருந்தது. இதில் சுமார் 18,000 தென்கொரிய வீரர்கள் பங்கேற்க உள்ளனர்.அதாவது, பயிற்சிகள் தொடங்குவதற்கு சரியாக ஒரு நாள் முன்னதாகவே டிரம்பின் உத்தரவு வெளியாகியுள்ளது.டிரம்பின் அறிவிப்புக்கு சில நாட்களுக்கு முன்பே, வடகொரியா அமெரிக்கா–தென்கொரியா ராணுவப் பயிற்சிகளை கடுமையாக எதிர்த்திருந்தது. இந்தப் பயிற்சிகள் கடந்த ஆண்டைவிட அதிக ஆத்திரமூட்டும் வகையில் இருப்பதாகவும், அதற்கு வலுவான தடுப்பு நடவடிக்கையால் பதிலளிப்போம் என்றும் பியோங்யாங் எச்சரித்திருந்தது.இதற்கிடையில் வடகொரியா சமீபத்தில் மீண்டும் குறுகிய தூர பாலிஸ்டிக் ஏவுகணை சோதனையையும் மேற்கொண்டுள்ளது.ஒருபுறம் கிம் ஜாங் உன்னுடன் உறவை மேம்படுத்த வேண்டும் என்ற டிரம்பின் அணுகுமுறை; மறுபுறம் வடகொரியாவின் ஏவுகணை மற்றும் அணு திறன்கள் அதிகரித்து வருவது அமெரிக்காவின் இந்த முடிவு பதற்றத்தைக் குறைக்கும் தூதரக முயற்சியா அல்லது அமெரிக்கா–தென்கொரியா பாதுகாப்பு கூட்டணிக்கு புதிய சிக்கலா என்ற கேள்வி எழுந்துள்ளது.மேலும், பயிற்சிகள் முற்றிலும் ரத்து செய்யப்படவில்லை; அவற்றில் அமெரிக்காவின் பங்களிப்பை குறைப்பதே தற்போதைய உத்தரவாக உள்ளது