சுரேஷ் சலேயின் கைது தமிழ் டயஸ்போராவை மகிழ்ச்சிப்படுத்துவதற்கே - மொட்டு கட்சி குற்றச்சாட்டு  பயங்கரவாத தடுப்புச் சட்டத்தை நீக்குவதாகக் கூறி ஆட்சிக்கு வந்த தற்போதைய அரசாங்கம், நாட்டிற்காக அளப்பரிய சேவையாற்றிய முன்னாள் புலனாய்வுப் பிரிவுத் தலைவர் சுரேஷ் சலேயை அதே சட்டத்தின் கீழ் தடுப்புக்காவலில் வைத்துள்ளதாக முன்னாள் நாடாளுமன்ற உறுப்பினர் சமன்பிரிய ஹேரத் தெரிவித்துள்ளார்.பத்தரமுல்ல நெலும் மாவத்தையிலுள்ள ஸ்ரீலங்கா பொதுஜன பெரமுன கட்சியின் தலைமையகத்தில் இன்றைய தினம் (05) நடைபெற்ற ஊடகவியலாளர் சந்திப்பில் கலந்துகொண்டு கருத்து தெரிவித்த அவர், முன்னாள் புலனாய்வுப் பிரிவுத் தலைவர் சுரேஷ் சலே நேற்றைய தினம் நீதிமன்றத்தில் பிணை கோரியிருந்த போது, அவர் சித்திரவதைக்கு உள்ளாக்கப்பட்டுள்ளதாக இரு புகழ்பெற்ற ஜனாதிபதி சட்டத்தரணிகள் சுட்டிக்காட்டியுள்ளனர் என்றார். மக்கள் போராட்டங்களில் தீவிரமாகப் பங்கெடுத்தவர்கள் பயங்கரவாத தடுப்புச் சட்டத்தின் கீழ் கைது செய்யப்பட்டபோது கூட அவர்களுக்கு எந்தவொரு உடல்ரீதியான சித்திரவதைகளும் செய்யப்படவில்லை என்றும், ஆனால் சுரேஷ் சலேவுக்கு இவ்வாறு நடந்திருக்குமாயின், அதற்கு ஜனாதிபதி உள்ளிட்ட அரசாங்கமே முழுப் பொறுப்பையும் ஏற்க வேண்டும் என்றும் அவர் வலியுறுத்தினார். மேலும், தமிழ் டயஸ்போராவை  மகிழ்ச்சிப்படுத்துவதற்காக மேற்கொள்ளப்படும் இவ்வாறான அரசியல் பழிவாங்கல்களை ஜனாதிபதி உடனடியாக நிறுத்த வேண்டும் எனவும் அவர் கேட்டுக்கொண்டார்.தொடர்ந்து கருத்து வெளியிட்ட சமன்பிரிய ஹேரத், 'Rebuilding Sri Lanka' கணக்கில் உள்ள நிதி, 'தித்வா' சூறாவளியால் பாதிக்கப்பட்டவர்களுக்காக இதுவரை பயன்படுத்தப்படவில்லை எனச் சுட்டிக்காட்டியதுடன், இயற்கை அனர்த்தங்களைக்கூட மேலாண்மை செய்ய முடியாத ஒரு தோல்வியடைந்த அரசாங்கமாகவே தற்போதைய ஆட்சி காணப்படுகிறது என்றார். அரச அதிகாரிகள் தமக்குரிய தீர்மானங்களை எடுக்க பயப்படுவதால் அனர்த்த முகாமைத்துவப் பணிகள் முற்றாக முடங்கியுள்ளதாகவும், மஹிந்த ராஜபக்ஷவின் காலத்தில் இவ்வாறான அனர்த்தங்களுக்கு முன்கூட்டிய தயார்படுத்தல்கள் இருந்ததாகவும் ஆனால் இன்று உரிய திட்டமிடல் இல்லாததால் நூற்றுக்கணக்கான மக்களின் உயிர்கள் மண்ணோடு மண்ணாகி வருவதாகவும் அவர் குற்றம் சாட்டினார்.இந்த ஊடகவியலாளர் சந்திப்பில் கலந்துகொண்டு உரையாற்றிய முன்னாள் நாடாளுமன்ற உறுப்பினர் சம்பத் அத்துகோரள, தமக்கு ஆட்சி அதிகாரம் கிடைக்காது என்றெண்ணி பொய்களைக் கூறி ஆட்சியைப் பிடித்த ஜனாதிபதி அனுரகுமார திசாநாயக்கவின் நிலைமை, 'அந்தரேயின் தோள் மீது கல்லை வைத்த கதை' போன்றது என விபரித்தார். தேர்தல் காலத்தில் மக்கள் மத்தியில் பொய்களைக் கூறி ஆட்சியைப் பிடித்த ஜனாதிபதி, தற்போது தனது சகாக்களுடன் ஆட்சியை முன்னோக்கி கொண்டு செல்ல முடியாமல் திணறி வருவதாகவும், நாட்டை ஒரு எரிமலை மீது அமர வைத்துள்ளதாகவும் அவர் குறிப்பிட்டார்.பொருளாதார நிலைமை குறித்துப் பேசிய அவர், நேற்றைய நிலவரப்படி டொலர் ஒன்றின் மதிப்பு 340 ரூபாவாக உயர்ந்துள்ளதாகத் தெரிவித்தார். அரசாங்கத்தின் நெருங்கிய நண்பர்கள் டொலர்களை தமக்கேற்றவாறு பயன்படுத்த இடமளித்ததன் விளைவாகவே, இன்று சாதாரண அனாதை மக்கள் அரிசி, பருப்பு, சீனி போன்ற அத்தியாவசிய இறக்குமதிப் பொருட்களை அதிக விலைக்கு வாங்க வேண்டிய அவலநிலைக்குத் தள்ளப்பட்டுள்ளனர் என்றார்.மேலும், நாடாளுமன்றத்தை சுத்தப்படுத்தி புதிய அரசியல் கலாசாரத்தை உருவாக்குவதாகக் கூறி ஆட்சிக்கு வந்த இந்த அணியில், தமது பட்டப்படிப்பு சான்றிதழ்களைக் கூட கண்டுபிடிக்க முடியாத பேராசிரியர்களும், நீதிமன்றில் ஒரு வழக்கைக்கூட வாதாடாத சட்டத்தரணிகளும், மருத்துவமனையில் ஒரு நோயாளிக்குக்கூட மருந்து வழங்காத மருத்துவர்களுமே நிறைந்துள்ளனர் என விமர்சித்த அவர், இவ்வாறான எந்தவொரு நடைமுறை அறிவும் இல்லாத ஒரு குழுவினரிடமிருந்து நாட்டு மக்கள் எவ்வாறு சிறந்ததொரு அரச நிர்வாகத்தை எதிர்பார்க்க முடியும் எனவும் கேள்வி எழுப்பினார்.