மெரினா டவர் மீது ட்ரோன் தாக்குதல்; மக்களுக்கு வந்த அவசர செய்தி  ஐக்கிய அரபு அமீரகத்தின் (UAE) முக்கிய நகரங்களான துபாய் மற்றும் அபுதாபி மீது ஈரான் தொடர்ந்து தாக்குதல்களை நடத்தி வருவதால், அப்பகுதியில் பெரும் பதற்றம் நிலவி வருகிறது. குறிப்பாக, துபாயின் அடையாளமாகத் திகழும் ‘23 மெரினா டவர்’ (23 Marina Tower) மீதும்,  சர்வதேச விமான நிலையம் மீதும் நேற்று மேற்கொள்ளப்பட்ட ட்ரோன் தாக்குதல்கள் சர்வதேச அளவில் பேசுபொருளாகியுள்ளன.மத்திய கிழக்கு பிராந்தியத்தில் நிலவும் போர்ச் சூழலில், அமெரிக்கா மற்றும் தென்கொரியாவின் உதவியுடன் தற்காப்பு நடவடிக்கைகளை மேற்கொண்டு வரும் ஐக்கிய அரபு அமீரகத்தை, ஈரான் தனது இலக்குகளில் ஒன்றாகக் கருதுகிறது. இதன் தொடர்ச்சியாகவே, துபாய் மீதான தாக்குதல்களை ஈரான் தீவிரப்படுத்தியுள்ளது.உலகிலேயே குடியிருப்பிற்காகப் பயன்படுத்தப்படும் மிக உயரமான கட்டிடங்களில் ஒன்றான ‘23 மெரினா டவர்’ மீது நடத்தப்பட்ட ட்ரோன் தாக்குதலால் அப்பகுதி புகைமூட்டமாகக் காணப்பட்டது. இந்தத் தாக்குதலால் அருகிலிருந்த வீதிகள் மற்றும் வாகனங்கள் சேதமடைந்தன. இது குறித்துப் பேசிய அமீரக அதிபர், “நாங்கள் இத்தகைய அச்சுறுத்தல்களைக் கண்டு அஞ்சமாட்டோம். ஐக்கிய அரபு அமீரகம் வலிமையானது” எனத் தெரிவித்துள்ளார்.இந்தத் தாக்குதல்களால், துபாயில் வசிக்கும் பெரும் கோடீஸ்வரர்கள் மற்றும் தொழிலதிபர்கள் மத்தியில் பெரும் அச்சம் தொற்றியுள்ளது. தங்களின் முதலீடுகளைப் பாதுகாப்பாக வேறு நாடுகளுக்கு (உதாரணமாக சிங்கப்பூர்) மாற்றுவது குறித்து அவர்கள் ஆலோசனைகளை நடத்தி வருவதாகவும், இதனால் அங்குள்ள நிதிச் சந்தை ஸ்திரத்தன்மை பாதிக்கப்படும் அபாயம் இருப்பதாகவும் தகவல்கள் தெரிவிக்கின்றன.தாக்குதல் அச்சுறுத்தல் காரணமாகப் பல முன்னணி விமான நிறுவனங்கள் துபாய்க்கான விமானச் சேவைகளைத் தற்காலிகமாக நிறுத்தியுள்ளன.ஐக்கிய அரபு அமீரகத்தில் சிக்கியுள்ள தனது நாட்டுப் பிரஜைகளை வெளியேற்ற பிரிட்டன் சிறப்பு விமானங்களை (Chartered flights) ஏற்பாடு செய்துள்ளது.துபாய், ஷார்ஜா மற்றும் அபுதாபி பகுதிகளில் உள்ள பொதுமக்களுக்கு, பாதுகாப்பான இடங்களில் இருக்குமாறும், அதிகாரப்பூர்வத் தகவல்களை மட்டும் பின்பற்றுமாறும் அந்நாட்டு அரசாங்கம் அவசர எச்சரிக்கைகளை விடுத்துள்ளது.மத்திய கிழக்கு பிராந்தியத்தில் அமெரிக்காவின் முக்கிய இராணுவ ஆயுதமான ‘ஹைமார்ஸ்’ (HIMARS) பஹ்ரைனில் நிலைநிறுத்தப்பட்டதும், ஈரான் தனது தாக்குதல்களைத் தீவிரப்படுத்தியதற்குக் காரணமாகப் பார்க்கப்படுகிறது. இவ்வாறான இக்கட்டான சூழலில், இலங்கையிலிருந்து துபாயில் பணிபுரிபவர்கள் உட்பட,  அங்குள்ள அனைத்துப் பொதுமக்களையும் மிகுந்த விழிப்புடன் இருக்குமாறு அதிகாரிகள் கேட்டுக்கொண்டுள்ளனர்.