மாணவர்களை ஏற்ற மறுத்த சாரதி தற்காலிகமாக பணிநீக்கம் முல்லைத்தீவு – துணுக்காய் கல்வி வலயத்திற்குட்பட்ட மாங்குளம் மகாவித்தியாலய மாணவர்களை பேருந்தில் ஏற்றிச் செல்ல மறுத்ததாக எழுந்த கடுமையான குற்றச்சாட்டைத் தொடர்ந்து, இலங்கை போக்குவரத்துச் சபையின் சாரதி ஒருவர் உடனடியாகச் செயற்படும் வகையில் தற்காலிகமாகப் பணியிலிருந்து இடைநிறுத்தப்பட்டுள்ளார்.பனிக்கன்குளம், கிளவன்குளம் மற்றும் திருமுறிகண்டி உள்ளிட்ட பகுதிகளைச் சேர்ந்த மாணவர்கள், பாடசாலை நேரம் முடிந்த பிறகு தங்களது வீடுகளுக்குத் திரும்புவதற்காகப் பேருந்துக்காகக் காத்திருந்துள்ளனர்.அப்போது அங்கு வந்த இலங்கை போக்குவரத்துச் சபைக்குச் சொந்தமான பேருந்து ஒன்று, ஆசிரியர்களை மட்டும் ஏற்றிச் சென்றுவிட்டு, மாணவர்களை ஏற்றிச் செல்ல மறுத்ததாகக் குற்றஞ்சாட்டப்பட்டது.மேலும், அந்தச் சம்பவத்தின் போது பேருந்தில் ஏற முயன்ற மாணவி ஒருவர் தவறி கீழே விழுந்து அசௌகரியத்திற்கு உள்ளானதாகவும் தகவல்கள் வெளியாகியிருந்தன.ஊடகங்களில் இது தொடர்பான செய்திகள் வெளியாகி பரபரப்பை ஏற்படுத்திய நிலையில், வடக்கு மாகாண வீதிப் பயணிகள் போக்குவரத்து அதிகார சபை உடனடியாக விசாரணையில் இறங்கியது. அதில், குறிப்பிட்ட அந்தப் பேருந்து கண்டி பணிமனைக்குச் (Depot) சொந்தமானது என்பது கண்டறியப்பட்டது.இதனைத் தொடர்ந்து, சம்பந்தப்பட்ட சாரதியை உடனடியாகத் தற்காலிகப் பணி இடைநிறுத்தம் செய்வதற்கான நடவடிக்கைகள் எடுக்கப்பட்டுள்ளதாக வடக்கு மாகாண வீதிப் பயணிகள் போக்குவரத்து அதிகார சபையின் தலைவர் பொறியியலாளர் சூ. விமலேஸ்வரன் அவர்கள் அதிகாரப்பூர்வமாகத் தெரிவித்துள்ளார்.எதிர்காலத்தில் மாணவர்களுக்கோ அல்லது பொதுமக்களுக்கோ அசௌகரியத்தை ஏற்படுத்தும் வகையில் நடந்து கொள்ளும் சாரதிகள் மற்றும் நடத்துநர்கள் மீது தயவுதாட்சண்யமின்றி மிகக் கடுமையான நடவடிக்கைகள் எடுக்கப்படும் என்றும் அதிகார சபை எச்சரித்துள்ளது.