ஈரானுக்கு இதுவரை இல்லாத கடும் தடை ஈரான் மீது இதுவரை இல்லாத அளவுக்கு கடுமையான பொருளாதாரத் தடைகளை விதிக்க அமெரிக்கா தயாராகி வருவதாக அமெரிக்க கருவூலச் செயலாளர் ஸ்காட் பெசென்ட் தெரிவித்துள்ளார். இது வெறும் புதிய தடைகள் அல்ல. ஏற்கனவே நீடித்து வரும் மோதலுக்கு மத்தியில், அமெரிக்கா ராணுவ அழுத்தத்தை விட பொருளாதார அழுத்தத்தை மேலும் தீவிரப்படுத்தும் புதிய கட்டத்தை நோக்கிச் செல்கிறது.தெஹ்ரானைச் சேர்ந்த பேராசிரியர் முஸ்தபா கோஷ்செஷ்ம் முன்வைக்கும் கருத்து இதற்கு மாறுபட்டதாக உள்ளது.ஈரான் பல ஆண்டுகளாக அமெரிக்கத் தடைகளை எதிர்கொண்டு வருவதால், வெளிநாட்டு பொருளாதார ஆதரவு குறைந்தாலும் தன்னுடைய பொருளாதாரத்தை ஏதோ ஒரு அளவுக்கு தொடர்ந்து இயக்கும் திறனை உருவாக்கியுள்ளது என்பதே அவரது வாதம்.இதற்கு ஆதரவாக, ஈரானின் பொருளாதாரம் ஏற்கனவே நீண்டகால தடைகளையும் போர் அழுத்தங்களையும் தாங்கி வந்திருப்பதாக ஆய்வுகள் சுட்டிக்காட்டுகின்றன. எண்ணெய் வருவாய், மாற்று வர்த்தக வழிகள் மற்றும் தடைகளைத் தாண்டிய பரிவர்த்தனைகள் ஆகியவை அதன் பொருளாதாரத்தை முழுமையாக சரிவடையாமல் வைத்திருக்க உதவியுள்ளன.இதனால் ஈரான் எந்த பாதிப்பும் இல்லாமல் இருக்கிறது என்று அர்த்தமில்லை.ஏற்கனவே போர் மற்றும் தடைகளால் ஈரானில் விலைவாசி உயர்வு, நாணய மதிப்பு சரிவு மற்றும் வாழ்க்கைச் செலவு அதிகரிப்பு போன்ற அழுத்தங்கள் பொதுமக்களை கடுமையாக பாதித்து வருகின்றன.மேலும், அமெரிக்கா தடைகளை தீவிரப்படுத்தினால், ஈரானுடன் வர்த்தகம் செய்யும் நாடுகளும் அழுத்தத்துக்குள் வரக்கூடும்.