ராஜபக்‌ஷ குடும்பத்தை மண்டேலா, இம்ரான் கானுடன் ஒப்பிட முடியாது – சமீர பெரேரா பகிரங்கம் ராஜபக்‌ஷ குடும்பத்தின் அரசியல் வரலாற்றை பாகிஸ்தானின் முன்னாள் பிரதமர் இம்ரான் கான் மற்றும் தென்னாபிரிக்காவின் முன்னாள் ஜனாதிபதி நெல்சன் மண்டேலாவின் அரசியல் போராட்டங்களுடன் ஒப்பிட முடியாது என இலங்கை தொழிலாளர் மக்கள் முன்னணியின் தலைவர் சமீர் பெரேரா  தெரிவித்துள்ளார்.கொழும்பில் புதன்கிழமை (16) இடம்பெற்ற ஊடகவியலாளர் சந்திப்பில் கருத்து தெரிவிக்கும்போதே அவர் இதனைத் தெரிவித்தார்.நெல்சன் மண்டேலா தென்னாபிரிக்க மக்களின் உரிமைகளுக்காகவும் இனவெறிக்கு எதிராகவும் போராடியவர் எனக் குறிப்பிட்ட சமீர் பெரேரா, நாட்டை கொள்ளையடித்து பொருளாதாரத்தை சீரழித்ததாகக் கூறப்படும் குற்றச்சாட்டுகளின் அடிப்படையில் அவர் சிறைக்குச் செல்லவில்லை என சுட்டிக்காட்டினார்.எனவே, மண்டேலாவின் அரசியல் வரலாற்றை ராஜபக்‌ஷ குடும்பத்தின் அரசியல் பயணத்துடன் ஒப்பிடுவது பொருத்தமற்றது என அவர் தெரிவித்தார்.அதேபோன்று, இம்ரான் கான் பாகிஸ்தானின் அரசியல் சூழலில் ஊழலுக்கு எதிராகவும் அரசியல் மாற்றத்துக்காகவும் போராடியவர் என அவரது ஆதரவாளர்கள் கருதுவதாகவும், அவருக்கு எதிரான சட்ட மற்றும் அரசியல் நடவடிக்கைகளை ராஜபக்‌ஷ குடும்பத்துடன் ஒப்பிட முடியாது எனவும் சமீர் பெரேரா கூறினார்.ராஜபக்‌ஷ குடும்பத்தினர் நாட்டை ஆட்சி செய்த காலப்பகுதியில் இடம்பெற்றதாகக் கூறப்படும் ஊழல், மோசடி மற்றும் அதிகார துஷ்பிரயோகம் தொடர்பில் பல்வேறு குற்றச்சாட்டுகள் முன்வைக்கப்பட்டுள்ளதாகவும், நாட்டின் பொருளாதார வீழ்ச்சிக்கும் அவர்கள் பொறுப்பாளிகள் என பல்வேறு தரப்பினரால் குற்றஞ்சாட்டப்பட்டுள்ளதாகவும் அவர் குறிப்பிட்டார்.எனினும், குற்றச்சாட்டுகள் தொடர்பில் சட்டரீதியான விசாரணைகள் முன்னெடுக்கப்பட வேண்டும் எனவும், யார் குற்றவாளி, யார் குற்றமற்றவர் என்பதை நீதிமன்றங்களே தீர்மானிக்க வேண்டும் எனவும் அவர் தெரிவித்தார்.எனவே, தமது எதிர்கால அரசியல் நிலைமையை விளக்குவதற்காக நெல்சன் மண்டேலா மற்றும் இம்ரான் கான் ஆகியோரை முன்னுதாரணங்களாகக் கொண்டு ராஜபக்‌ஷ குடும்பத்துடன் ஒப்பிடுவது ஏற்றுக்கொள்ள முடியாதது என அவர் மேலும் தெரிவித்தார்.