எங்களுக்கு யாரும் ஆணையிட முடியாது-துருக்கி F-35 விவகாரத்தில் டிரம்ப் அதிரடி துருக்கிக்கு F-35 ரக போர் விமானங்களை வழங்குவது தொடர்பாக எழுந்த கேள்விக்கு அமெரிக்க அதிபர் டொனால்ட் டிரம்ப் பதிலளித்துள்ளார்.செய்தியாளர்களின் கேள்விக்கு பதிலளித்த அவர், "அமெரிக்கா எதை விற்க வேண்டும் அல்லது விற்கக் கூடாது என்று யாரும் எங்களுக்கு ஆணையிட முடியாது" என்று திட்டவட்டமாக தெரிவித்தார்.மேலும், துருக்கியை "ஒரு மகத்தான நட்பு நாடு" எனக் குறிப்பிட்ட டிரம்ப், எதிர்கால பாதுகாப்பு ஆயுத விற்பனை தொடர்பான அனைத்து முடிவுகளையும் வாஷிங்டனே தனது தேசிய நலன்களின் அடிப்படையில் எடுக்கும் என்று சூசகமாக தெரிவித்தார்.துருக்கிக்கு F-35 போர் விமானங்களை மீண்டும் வழங்குவது குறித்து சர்வதேச அளவில் தொடர்ந்து விவாதங்கள் நடைபெற்று வரும் நிலையில், டிரம்பின் இந்தக் கருத்து முக்கியத்துவம் பெற்றுள்ளது.கடந்த சில ஆண்டுகளாக, ரஷ்யாவின் S-400 ஏவுகணை பாதுகாப்பு அமைப்பை துருக்கி வாங்கியதைத் தொடர்ந்து, அந்த நாட்டை F-35 திட்டத்திலிருந்து அமெரிக்கா நீக்கியிருந்தது. இதனால், இரு நாடுகளுக்குமிடையேயான பாதுகாப்பு ஒத்துழைப்பில் மாற்றங்கள் ஏற்பட்டிருந்தன.இந்நிலையில், துருக்கியை மீண்டும் F-35 திட்டத்தில் இணைப்பது குறித்த விவாதங்கள் நடைபெற்று வரும் வேளையில், அமெரிக்காவின் இறுதி முடிவு வாஷிங்டனின் கையிலேயே இருக்கும் என்பதை டிரம்ப் தனது கருத்தின் மூலம் மீண்டும் வலியுறுத்தியுள்ளார்.