அமெரிக்காவிற்கு ஈரான் கொடுத்த சக்திவாய்ந்த பதிலடி-நடுக்கடலில் ஏவுகணை மழை பாரசீக வளைகுடாவில் அமைதி நிலவும் என எதிர்பார்க்கப்பட்ட நிலையில், அமெரிக்கா போர் நிறுத்தத்தை மீறிவிட்டதாக ஈரான் ராணுவம் பகிரங்கமாகக் குற்றம் சாட்டியுள்ளது. இதற்குப் பதிலடியாக ஹார்முஸ் ஜலசந்தியில் உள்ள அமெரிக்கப் போர்க்கப்பல்கள் மீது ஈரான் நடத்திய ஏவுகணைத் தாக்குதலால் பிராந்தியம் முழுவதும் உச்சகட்ட பதற்றம் நிலவுகிறது.ஈரானின் ஜஸ்க் (Jask) பகுதியில் இருந்து புறப்பட்ட ஒரு எண்ணெய் கப்பல் மற்றும் அமீரகத்தின் புஜைரா அருகே வந்த மற்றொரு கப்பலை அமெரிக்கப் படைகள் இலக்கு வைத்துள்ளன.ஈரானின் பண்டர் கமீர் (Bandar-e Khamir), சிரிக் (Sirik) மற்றும் கெஷ்ம் (Qeshm) தீவின் கடற்கரையோரப் பகுதிகளில் உள்ள பொதுமக்கள் குடியிருப்புப் பகுதிகள் மீது அமெரிக்கா வான்வழித் தாக்குதல் நடத்தியுள்ளதாக ஈரான் இராணுவ செய்தித் தொடர்பாளர் இப்ராஹிம் சோல்பகாரி தெரிவித்துள்ளார்.இதற்குப் பதிலடியாக, ஹார்முஸ் ஜலசந்தியின் கிழக்கே மற்றும் சாபஹார் துறைமுகத்திற்குத் தெற்கே நிலைநிறுத்தப்பட்டிருந்த அமெரிக்கப் போர்க்கப்பல்கள் மீது ஈரானியப் படைகள் தாக்குதல் நடத்தின.இந்தத் தாக்குதலில் அமெரிக்கக் கப்பல்கள் கணிசமான சேதத்தைச் சந்தித்துள்ளதாக ஈரான் தரப்பு கூறினாலும், அமெரிக்க மத்திய கட்டளை அமைப்பு (CENTCOM) இதனை மறுத்துள்ளது.