ஹோர்முஸ் விவகாரத்தில் ஈரான் கடும் எச்சரிக்கை ஈரானின் ஒப்புதல் இல்லாமல் ஹோர்முஸ் ஜலசந்தியை மீண்டும் திறக்க முடியாது என அந்நாட்டு நாடாளுமன்ற தேசிய பாதுகாப்பு மற்றும் வெளியுறவுக் கொள்கை குழுத் தலைவர் இப்ராஹிம் அஜிஜி தெரிவித்துள்ளார்.ஈரான் முன்வைத்துள்ள ஹோர்முஸ் தொடர்பான புதிய சட்ட முன்மொழிவில், தாங்கள் “விரோத நாடுகள்” எனக் கருதும் நாடுகளின் இராணுவ மற்றும் வர்த்தகக் கப்பல்கள் ஈரானின் அனுமதியின்றி பாரசீக வளைகுடாவுக்குள் நுழையக் கூடாது என குறிப்பிடப்பட்டுள்ளது.அஜிஜியின் கூற்றுப்படி, ஈரானின் எதிரிகள் முன்பு இப்பகுதியில் தங்களது இராணுவ இருப்பை நிலைநிறுத்தியிருந்தாலும், தற்போது அவர்கள் சுமார் 800 கிலோமீட்டர் தொலைவுக்கு பின்வாங்கியுள்ளதாக அவர் தெரிவித்துள்ளார். மேலும், நீர்வழிப்பாதையை தங்களால் திறக்க முடியாததால் அவர்கள் பல்வேறு நடவடிக்கைகளில் ஈடுபடுவதாகவும் அவர் குற்றம்சாட்டியுள்ளார்.ஈரான் ஏற்கனவே ஹோர்முஸ் வழியாகச் செல்லும் கப்பல்களுக்கு கட்டுப்பாடுகளை விதித்து வரும் நிலையில், செப்டம்பர் 2ஆம் தேதி மேலும் 11 கப்பல்களை தனது தடுப்புப் பட்டியலில் சேர்த்துள்ளது. இதன் மூலம் அந்தப் பட்டியலில் உள்ள கப்பல்களின் எண்ணிக்கை 56 ஆக உயர்ந்துள்ளதாக Reuters தெரிவித்துள்ளது.மேலும், ஈரானின் கட்டுப்பாடுகள் காரணமாக உலகின் முக்கியமான எண்ணெய் மற்றும் எரிவாயு போக்குவரத்து பாதைகளில் ஒன்றான ஹோர்முஸ் ஜலசந்தியில் கப்பல் போக்குவரத்து கடுமையாக பாதிக்கப்பட்டுள்ளது. அமைதிக்காலத்தில் உலகளாவிய எண்ணெய் மற்றும் திரவ இயற்கை எரிவாயு விநியோகத்தில் சுமார் ஐந்தில் ஒரு பங்கு இந்த நீர்வழியை கடந்து செல்கிறது.ஈரான்–அமெரிக்கா இடையிலான மோதல் மீண்டும் தீவிரமடைந்துள்ள நிலையில், ஹோர்முஸ் ஜலசந்தியின் கட்டுப்பாடு இரு தரப்புக்கும் இடையிலான முக்கியமான போராட்டப் புள்ளியாக மாறியுள்ளது.