Chess உலகை திரும்பிப் பார்க்க வைத்த தமிழ்ச் சிறுமி இங்கிலாந்து அணிக்காக விளையாடிய இந்திய வம்சாவளித் தமிழ் சிறுமியான போதனா, உலக செஸ் வரலாற்றில் மிகக் குறைந்த வயதில் மகளிர் கிராண்ட்மாஸ்டர் (WGM) பட்டத்திற்கான அனைத்து தகுதிகளையும் நிறைவு செய்த வீராங்கனையாக மாறியுள்ளார்.உஸ்பெகிஸ்தானின் சமர்கண்ட் நகரில் நடைபெற்ற 46ஆவது செஸ் ஒலிம்பியாட் தொடரில் இங்கிலாந்து அணியின் முதல் பலகையில் விளையாடிய அவர், தனது மூன்றாவது மற்றும் இறுதி WGM தகுதிநிலையை நிறைவு செய்தார். இதன் மூலம் இதுவரை 12 வயதில் இந்த சாதனையைப் படைத்திருந்த கதரீனா லக்னோ உள்ளிட்ட வீராங்கனைகளின் வயது சாதனையை அவர் முறியடித்துள்ளார்.போதனா இந்த ஒலிம்பியாட் தொடரின் 11 சுற்றுகளிலும் இங்கிலாந்தின் முதல் பலகையில் விளையாடி மொத்தம் 8 புள்ளிகளை பெற்றுள்ளார்.லண்டனில் வசிக்கும் போதனா, கொரோனா பெருந்தொற்று ஊரடங்கு காலத்தில் செஸ் விளையாடத் தொடங்கினார். அதன் பின்னர் மிகக் குறுகிய காலத்திலேயே சர்வதேச அளவில் கவனம் பெற்ற வீராங்கனையாக வளர்ந்துள்ளார்.2026ஆம் ஆண்டில் அவர் ஏற்கனவே பிரிட்டனின் இளம் வயது மகளிர் செஸ் சாம்பியன் என்ற சாதனையையும் படைத்திருந்தார். அதற்கு முன்னதாகவே சர்வதேச மாஸ்டர் தகுதிநிலையிலும் பல்வேறு வயது சாதனைகளையும் அவர் பதிவு செய்துள்ளார்.தனது சாதனை குறித்து அவர், “இதைச் சாதித்ததில் மகிழ்ச்சி. ஆனால் இங்கே நின்றுவிடாமல் தொடர்ந்து வரலாறு படைக்க விரும்புகிறேன்” என்ற கருத்தை தெரிவித்துள்ளார்.11 வயதிலேயே உலகின் மிக உயர்ந்த மகளிர் செஸ் பட்டத்திற்கான தகுதிகளை நிறைவு செய்திருப்பதுடன், சர்வதேச மாஸ்டர் பட்டத்தையும் நோக்கி முன்னேறி வரும் போதனாவின் அடுத்த கட்ட சாதனைகள் மீது தற்போது செஸ் உலகின் கவனம் திரும்பியுள்ளது.