​50 இலட்சம் 5 இலட்சமானது: ஜனாதிபதியின் வாக்குறுதிகள் காற்றில் பறக்கவிடப்பட்டுள்ளதாக குற்றச்சாட்டு ஜனாதிபதி பாராளுமன்றத்தில் ஆற்றிய உரையின் படி, அனர்த்தங்களினால் பாதிக்கப்பட்ட மக்களுக்கு தலா 50 இலட்சம் ரூபா வழங்கப்படும் எனக் கூறப்பட்ட போதிலும், இன்று அந்தத் தொகை 5 இலட்சம் ரூபா வரை குறைக்கப்பட்டுள்ளது என்று முன்னாள் பாராளுமன்ற உறுப்பினர் சமன்பிரிய ஹேரத் தெரிவித்தார்.பத்தரமுல்லவில் உள்ள ஸ்ரீலங்கா பொதுஜன பெரமுனவின் கட்சித் தலைமையகத்தில் இன்று நடைபெற்ற ஊடகவியலாளர் சந்திப்பில் கலந்துகொண்டு கருத்து தெரிவிக்கும் போதே அவர் இதனைத் தெரிவித்தார்.அங்கு தொடர்ந்து கருத்து தெரிவித்த முன்னாள் பாராளுமன்ற உறுப்பினர், கடந்த காலங்களில் ஏற்பட்ட நிலச்சரிவு மற்றும் வெள்ளப் பெருக்கினால் பாதிக்கப்பட்ட மக்களின் வாழ்க்கை இன்னும் இயல்பு நிலைக்குத் திரும்பவில்லை எனக் குறிப்பிட்டார்.அரசாங்கம் கடந்த காலங்களில் கூறிய பொய்கள் பாரிய ஏமாற்றத்தை அளித்துள்ளதாகவும், இதனால் அப்பாவி மக்களின் அன்றாட நடவடிக்கைகள் பெரும் சவாலுக்கு உள்ளாகியுள்ளதாகவும் அவர் கூறினார். பாராளுமன்றத்தில் உரையாற்றிய ஜனாதிபதி, பாதிக்கப்பட்டவர்களுக்கு தலா 50 இலட்சம் ரூபாவும், கூரைத் தகடு சேதமடைந்தால் 10 இலட்சம் ரூபாவும் வழங்கப்படும் எனக் கூறியிருந்தார். ஆனால் தற்போது அந்த வாக்குறுதி 5 இலட்சம் ரூபாவாகக் குறைக்கப்பட்டுள்ளது. மக்களுக்கு வழங்கிய வாக்குறுதியை நிறைவேற்றுவது ஒரு ஜனாதிபதியின் பொறுப்பாகும் என்றும், அவ்வாறு செய்யத் தவறினால் மக்கள் இந்த அரசாங்கத்தை வீட்டிற்கு அனுப்பும் நிலையை உருவாக்குவார்கள் என்றும் அவர் எச்சரித்தார்.இந்த அரசாங்கம் ஆரம்பத்திலிருந்தே பல்வேறு போலியான விடயங்களை முன்னிலைப்படுத்தி வருவதாகக் குறிப்பிட்ட அவர், ரங்வல என்பவரின் கலாநிதிப் பட்டம் தொடர்பான விவகாரத்தையும் சுட்டிக்காட்டினார். அத்துடன், அண்மையில் பொலிஸ் உத்தியோகத்தர் ஒருவர் தாக்கப்பட்ட சம்பவம் குறித்தும், சட்டத்தை முறையாக அமுல்படுத்த வேண்டியதன் அவசியம் குறித்தும் அவர் வலியுறுத்தினார். சட்டத்தை துஷ்பிரயோகம் செய்ய வேண்டாம் என பொலிஸ் மா அதிபரிடம் கோரிக்கை விடுத்த அவர், எதிர்காலத்தில் இதற்கான விலையைச் செலுத்த நேரிடும் என்றும் குறிப்பிட்டார்.மேலும், கொழும்பு துறைமுகத்திலிருந்து வெளியேறிய 323 கொள்கலன்களில் ஆயுதங்கள் இருந்ததாக பாராளுமன்ற உறுப்பினர் அர்ஜுனா பகிரங்கமாகத் தெரிவித்தும், அது குறித்து இதுவரை எந்த விசாரணையும் நடத்தப்படவில்லை என அவர் சாடினார். தமக்கு நெருக்கமான ஒருவரை கணக்காய்வாளர் நாயகமாக நியமித்து, ஊழல்களை மறைக்க அரசாங்கம் முயற்சிக்கிறதா என்ற சந்தேகம் எழுவதாகவும் அவர் தெரிவித்தார்.மக்களின் அன்றாடப் பிரச்சினைகளை திசைதிருப்புவதற்காக அரசாங்கம் பல்வேறு தலைப்புகளை உருவாக்கி வருவதாகவும், ஜே.வி.பி யின் தலைவர்கள் சொத்து விபரங்கள் தொடர்பில் வெளியிடும் கருத்துக்கள் மக்களை ஏமாற்றும் செயல் என்றும் அவர் விமர்சித்தார்.அமைச்சர் சமந்த வித்தியாரத்னவின் கருத்துக்களைச் சாடிய அவர், தேர்தலுக்கு முன்னர் சொகுசு வாகனங்களை ஏலம் விடுவதாகக் கூறியவர்கள், இன்று அமைச்சுக்களில் உள்ள வாகனங்கள் தரம் குறைந்தவை எனக் கூறி புதிய வாகனங்களை இறக்குமதி செய்ய முயற்சிப்பதாகக் குற்றம் சாட்டினார். புதிய வாகனங்களுக்காக செலவிடப்படும் நிதியை அனர்த்தங்களினால் பாதிக்கப்பட்ட மக்களுக்கு வழங்க வேண்டும் என அவர் கோரிக்கை விடுத்தார். கோட்டாபய ராஜபக்சவின் ஆட்சிக் காலத்தில் அனர்த்த மேலாண்மை மத்திய நிலையம் பாதுகாப்பு அமைச்சின் கீழ் கொண்டு வரப்பட்டு வினைத்திறனாகச் செயற்பட்ட போதிலும், இன்று அரச அதிகாரிகள் தீர்மானங்களை எடுக்கப் பயப்படுவதாக அவர் தெரிவித்தார்.